KORANHARIANBANYUASIN.ID - Nyelek biduan bekenyit di atas panggung hiburan, mulai palak lutut Wak Barab beketir begoyang. Semakin musik cadas, tambah lincah goyangan lutut kanti sikok tu.
"Ngape palak lutut beketirni kanti, pecaknye kontak langsung dengan joget biduantu," tanye Wak Uban sambil nahan palak lutut Wak Barab, sebab goyangannye semakin kuat.
Langsung tangan Wak Barab nepis pegangan tangan Wak Uban. "Ape-ape-an pule kau ni kanti, lutut ku ni begoyang dewek, sebab goyang biduan tu langsung nyetrum," jawab Wak Barab sambil tesenge.
Dipacul kenye pegangan Wak Uban dari palak lutut kantinye. "Aku pegang lutut mu tu, karne lincup, agek tesengol laju pacul, lutut lah mak belalang cadak, kalu melanting agek engkolnye, nah balak laju," simbat Wak Uban.
Rupenye Wak Barab tekenang maseh mude dulu, karne masa bujang dulu galak nyanyi lagu dangdut. "Tau lah dewek kau kanti, aku kan setuju nian lagu Arafik, ape lagi nyelek goyangannye mak cacing kepanasan," timpal Wak Barab.
Dem! Abes akal Wak Uban, ade gale jawab katinye. "Dem kanti, kalu tue care tue, tak pacak nak balek mude. Dioperasi plastik, dipasang gigi palsu, disemirlah rambut, maseh keriput tulah, atas bawa, depan belakang, maseh mak terong busok tula," kelakar Wak Uban lah pegel ati.